O inicio de curso é un momento cheo de novidades, ilusión e tamén algúns nervios, especialmente para aqueles que comezan unha nova etapa no colexio. Por iso, cada ano poñemos en marcha unha experiencia moi especial en Primaria: os nosos alumnos e alumnas maiores convértense en compañeiros e referentes dos máis pequenos.
Este curso, o alumnado de 5.º de Primaria acompaña aos nenos e nenas de 1.º, mentres que o alumnado de 6.º recibiu e acompañará aos de 2.º na súa chegada ao centro.
Máis alá dun simple xesto de benvida, esta iniciativa busca crear vínculos e favorecer que os primeiros días sexan máis próximos e acolledores. Para os máis pequenos, contar con alguén que os recibe, os orienta e comparte con eles estes primeiros momentos axúdalles a afrontar o cambio con maior confianza e seguridade.
Para os maiores, supón unha oportunidade para asumir responsabilidades, coidar, axudar e poñerse ao servizo dos demais. Tamén lles permite descubrir algo importante: que eles teñen moito que achegar e que acompañar a outra persoa é, en si mesmo, unha forma de aprender.
Porque no noso colexio entendemos que a educación tamén acontece cando aprendemos uns dos outros, cando tendemos a man e cando facemos que alguén se sinta esperado e acompañado.
Unha experiencia sinxela, pero chea de significado: medrar non consiste só en facerse maior, senón tamén en aprender a coidar dos demais.
